Lev 12 | NdeIBE | STEP | UJehova wathi kuMosi:

Leviticus 12

Ukuhlanjululwa kokubeletha komntwana

1 UJehova wathi kuMosi: 2 “Tshela abako-Israyeli ukuthi: umfazi ozithweleyo obelethe indodana uzakuba ngongcolileyo ngokomkhuba okwezinsuku eziyisikhombisa njengoba engcolile ngesikhathi esemfuleni.

3 Ngosuku lwesifica mibili indodana le kuzamele isokwe. 4 Owesifazana kufanele ame okwezinsuku ezingamatshumi amathathu lantathu ukuze ahlanjululwe ukopha kwakhe. Ngalesisikhathi akufanele abambe ulutho olungcwele njalo akumelanga aye endlini engcwele kuze kwedlule insuku zakhe zokuhlanjululwa. 5 Nxa angabeletha indodakazi, owesifazane uzabe engongcolileyo okwamaviki amabili, njenganxa esemfuleni. Kufanele ahlale okwezinsuku ezingamatshumi ayisithupha lezinsuku eziyisithupha ukuze ahlanjululwe ukopha kwakhe.

6 “ ‘Nxa izinsuku zokuhlanjululwa ngokwendodana loba indodakazi seziphelile, kumele owesifazane alethe izinyane lemvu elilomnyaka owodwa kumphristi esangweni leThente lokuHlanganela ukuze libe ngumhlatshelo wokutshiswa kanye lomntwana wenkwilimba loba ijuba kube ngumnikelo wesono. 7 Umphristi nguye ozaqhuba umnikelo phambi kukaJehova ukumenzela ukubuyisana, ngalokho uzabe esehlambulukile ngokomkhuba ekopheni kwakhe. “ ‘Le yiyo imithetho elandelwa ngowesifazane ekubeletheni umfana loba inkazana. 8 Nxa engenelisi ukunikela ngezinyane lemvu, kumele alethe amajuba amabili loba abantwana benkwilimba ababili, okunye kungumhlatshelo wokutshiswa okunye kungumnikelo wesono. Ngalindlela umphristi uzamenzela ukubuyisana, owesifazana uzahlambuluka.’ ”